Plantun de Prouvènço

Pèr coumpara dos planto d'encò nostre

Orobanche teucrii & Arundo donax

Orobanche teucrii

Orobanchaceae

Nom en français : Orobanche de la germandrée.

Descripcioun :
Aquesto erbo-de-taurèu se rescontro dins li tepiero roucaiouso e lis esboudèu cauquié pulèu en mountagno. Parasito li calamandrié, g. Teucrium, mai pas soulamen. Sèmblo proun à Orobanche caryophyllacea, pamens èi pu founso (roujo à brunello), pu pichoto e a mens de flour. Coume elo lis estamino soun estacado à la baso di petalo e à l'estigmate rouge à brun.

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 40 cm
Fueio : ges
Tipe bioulougico : Teroufite
Cicle bioulougico : Planto de l'an

Gènre : Orobanche
Famiho : Orobanchaceae

Ordre : Lamiales

Coulour de la flour : Brunello
Petalo : irreguliero
Ø (o loungour) flour : 2 à 2,8 cm
Flourido : Printèms - Estiéu

Sòu : Ca
Autour basso e auto : 200 à 1900 m
Aparado : Noun
Mai à juliet

Liò : Tepiero roucaiouso - Roucaio - Pelouso - Esboudèu
Estànci : Subremediterran à Subaupen
Couroulougi : Éuroupenco
Ref. sc. : Orobanche teucrii Holandre, 1829

Cano

Arundo donax

Poaceae Graminaceae

Autre noum : Canié.

Noms en français : Canne de Provence, Roseau à quenouilles.

Descripcioun :
La cano que ié dison "de Prouvènço" es uno plano bèn couneigudo emé si grando e gròssi tijo lignouso d'enviroun 3,5 cm de diamètre, si long rizoumo espès e si fueio verdalo de 2 à 5 cm de larg.

Usanço :
La cano que nous vèn dóu cèntre de l'Asìo, fuguè proun plantado pèr proutegi li culturo dóu mistral. Nòstis àvi se n'en servien pèr gaubeja mant'uno besougno : pèr eisèmple pèr apara li det dóu tai dóu voulame (li dedau) o enca pèr acroucha lou calèu (la moco). Lou rizoumo èi manjadis (li fueio peréu, mai soun proun amaro) cue (rousti o bouli) o adouba en farino pièi mesclado à d'autro. Emai èro pas gaire emplegado coume planto vertuouso, aro d'ùni prouprieta soun estado troubado coume dins la dessensibilisacioun pèr l'alergìo.